投資心態修煉

承接上篇，認為價值投資者心態上不應該著重宏觀環境、大市走勢，所以今次展望只關注我持有公司26年我希望佢可以做到的事。

首先，同25年一樣繼續持有阿里、騰訊、美團、富途、攜程、谷歌、拼多多

26年會加上泡泡瑪特、Meta

都係目的長期持有，除非估值升到太誇張，暫時只有Google我係認為開始接近偏貴。

先講下我個人展望：

26年可以跑贏標普1%

繼續目標減10KG

全年睇12本書

Pass日文N5同CFA level 1

每日可以抽5-6小時閱讀（業績，年報，書，報告等等）

之後就講公司

阿里巴巴：三個展望，全年中國零售可以去到7%增長，阿里雲可以去到35%增長，經調整EBITA率去到15%，國際電商業務全年可以盈利，同埋控制下即時零售補貼金額，全年小於200億

騰訊：首先本土遊戲收入可以增長10%，國際遊戲可以增長20%，廣告業務增長20%，金融企業+7%，然後繼續回購，保持到25年的淨利率。騰訊算係確定性最大的公司

美團：希望整體收入可以+20%，但比較被動，因為收入限制於阿里在即時零售補貼，但目前阿里係縮減補貼。另一點希望KeeTa在中東市佔率可以再做好D，巴西的話可以見到市佔率有明顯上升，之後美團業績會講多D海外業務。

富途：比較簡單，希望26年新增資產用戶可以超過80萬，淨利潤可以超過140億港元。

攜程：雖然旅遊業係中國既其中一個黃金賽道，但礙於內地競爭好大所以收入大約都係增長15%左右，但攜程國際業務係有絕對領先優勢，26年希望可以做到單季度盈利，國際業務未來扭虧為盈對於公司整體利潤率會有好大提高。

拼多多：得番7-8PE既公司無咩可以要求，但我認為佢26年利潤係可以去返24年154億美金的盈利，另外我會希望Temu今年可以做到單季度盈利，27年全年盈利。

Meta：核心業務收入可以增長15%我自己已經好滿意，對於Meta唔算難，Threads啱開始變現，AI繼續提高廣告精準度。另外我自己係唔介意Meta燒錢，但係望26年可以燒得精準D，MSL可以有更多消息，AI眼鏡可以保持到領先。

Google：現價確實偏貴，今年撇開投資收益盈利大約1175億，PE大約32，用DCF計都係偏貴，如果用26年利潤計（1400億）PE超過35我會減持D，睇下到時候上面提及既公司有邊間覺得平就加點。所以26年展望就係核心利潤1400億，但係實際出黎數字可能會高達2000億以上（因為會有大量投資收益），公司持有7%SpaceX，目前估值8000億，如果用1.5萬億上市，二級市場基本上會FOMO到2萬億，另外26年Anthropic估值亦會大幅上升，所以大家見到下年Google盈利大幅上升，切忌要理性。

泡泡瑪特：對比以上爭議比較多，但係目前估值真係算平，主要太多人質疑公司收入可以持續性，但其實公司係比較注重營運，未來三年我自己心目中的泡泡瑪特依然會係一間盈利很強的公司。詳細留番3月全年業績再分享，26年目標可以推進拉美同中東業務，美國業務更好地整合。26年如果推出The Monsters系列大電影的話，希望可以透過電影令到入面除了Labubu的其中一個IP成為10億級IP。利潤上希望26年可以樂觀地衝擊200億淨利潤。

詳細就留業績期再講吧，最後2026祝大家身體健康，可以過自己喜歡的生活，做自己喜歡的事，我自己係幾喜歡目前全職價值投資生活！人生太短，珍惜我們擁有的時間！

巴菲特係2011年股東大會上QNA時，被股東質疑過去十年BRK跑唔贏黃金的升幅，之後用10分鐘時間去解說係佢眼中既三種資產，1.任何以貨幣計價的東西 2.不會產生任何東西的資產 3.擁有生產力的資產

我認為對於投資者黎講係十分值得一看，釐清你對資產的認知，鏈接會放下面

1.任何以貨幣計價的東西
可以係債券，現金，貨幣市場基金，任何和貨幣相關的投資，等於同時押注政府現在和未來的行為，而隨住時間的推移，幾乎所有貨幣都會貶值，並用日本的例子指出貨幣貶值比升值更容易起作用，所以結論係除非可以在貨幣上獲得極高回報，否則無論你身處在任何國家，其實都係沒有意義

2.不會產生任何東西的資產
最經典例子就是黃金，或者現在的比特幣，白銀等等，當中就用黃金去舉一個例子，假如把全世界的黃金鑄成一個立方體，會得到一個邊長越67英呎的立方體，總重量大約17萬噸，但你投資黃金的原因，只係希望未來幾年會有人用更多的價錢去購買你的黃金，即使過了19年，你擁有既17萬噸黃金還是黃金，但期間黃金並沒有生產任何東西，其實你只不過賭緊未來幾年時間人類對紙幣的恐懼，所以對於黃金，巴菲特不認為係一項投資，只是在打賭別人會否為一項不能做任何事的資產支付更高的價格購買。以當時2011計價，呢個立方體價值8萬億美金，但同時你可以用2萬億買下全美國150平方英里的農地，再用4萬億買10間XOM，同時仲有2萬淨，所以呢個就取決於投資者決定

其實睇到呢到你亦明白到點解巴菲特話永遠不會投資比特幣

3.擁有生產力的資產
呢類資產的價值可以由他的生產力定義，例子有公司，農地，房地產。而你決定去支付幾多錢買呢樣資產係基於你認為資產本身在一段時間內可以產生幾多收益，所以你不應該擔心呢個資產在一天，一個月或者一年後的報價，而是關注佢既生產力。所以佢亦夠膽打賭在一段長週期，資產3表現係會跑贏資產2.不過在資產2價格上升時，確實係會影響人的行為，因為人總係喜歡買價格一直上升的東西，但隨著時間的推移這並不是致富之道。

巴菲特曾經提出以下2個問題來說明道理：

第一個問題：假如你每天都要吃漢堡包，而你又沒有養牛，你寧願牛肉的價格每天都在漲價還是跌價呢？ 第二個問題：假如你是長線投資者，並預計未來5至10年都會不斷儲蓄來投資股票，你寧願股價不斷上升還是下跌呢？

確實，牛市會令人好興奮，尤其你係一個啱進入股市既人，將一筆錢投入股市，可能瘋狂既牛市好快咁將你筆錢翻一倍，二倍，甚至四倍，但同時牛市將你所持有的公司與安全邊際越拉越遠，你依然會有工作上的收入，若果繼續投資股市，你就會以不合理的價格買入公司，簡單講就係捱貴貨，以tesla為例子，大選前價格為250，去到最近高位為480，短短兩個月時間唔夠，升幅接近1倍，但同時我見唔到任何基本面變化，對於我黎講反而係一個適合賣出時機 當然你會話，我在最高點賣出所有持倉就可以了，但除左有時光機之外，無人知道邊個位係高點，就咁簡單一問呢兩日的美股表現，是獲利回吐？調整？還是可能係2022年式的跌浪開始？相信巴菲特都唔知，所以我們可以做的只可以在合理的價格買入公司，當然最理想係大幅低於合理價格的時候買入公司，但在牛市發生的機會接近零

熊市中累積財富的邏輯，要明白市場波動係一種資產重新定價的過程。當經濟數據不佳、企業業績不如預期時，市場會對資產進行重新評估，往往導致價格下跌，對於長期投資者來說，這種價格的下降提供了以更低的成本購買優質資產的機會，在熊市你會不難發現周街都係平到不合理的股票就好似23年尾既中港市場，以美團為例子，股價持續低於100半年，市值低於六千億，但係核心業務盈利係接近400億，而美團在中國係接近壟斷，所以個人認為係一個好好既投資機遇，當時都仲有15蚊既小米，300樓下既騰訊，6字頭的阿里巴巴等等,但當時你只會見到珍惜生命，遠離港股既口號（雖然依家都係），我亦明白由圖表/價格去睇，確實需要遠離，但股價只是市場短期投票得出，未必可以反應公司本身的價值。但若果從投資角度出發，熊市除左提供價廉物美的股票外，仲會幫你檢視邊D公司可以穿越牛熊週期。當然，熊市買貨需要你對你買個間公司有好深既認知，所以閱讀財報才是投資市場決勝的關鍵。 以阿里巴巴為例，大部人都會用垃圾形容，無他，因為股價由300跌落去60，但我的看法卻是應該收集，因為我認知中阿里內在價值遠遠大於一萬五千億

對衝基金經理,一個令無數人嚮往既職業,他背後的象征就是用之不盡的財富，每秒鐘幾百萬上落，低買高賣，精通金融領域上的法則，大戶等等等.. 但如果我話，只是一個啱啱畢業的大學生，或者中學都未畢業的中學生，在投資領域上都可以擊敗一個資深的對衝基金經理，

你又覺得有沒有可能呢？

2007年，巴菲特設下一個百萬賭局 打賭在10年內指數基金（標準普爾500指數）將會跑贏精選對衝基金，賭注為100萬美元 開始沒有人夠膽應戰，終於有一位避險基金經理人Ted Seides 接受了挑戰，他挑選了 5 檔避險基金挑戰巴菲特。 最後10年的表現圖在上圖就能看到，SP500輕鬆大幅跑贏了所謂的ibanker,指數創造了平均每年 7.1％ 的好表現，而 泰德．塞德斯 的避險基金組合只有每年 2.1%，即使其中表現最好的 C Fund 也只有每年 5.6％

睇到呢度，你會唔會覺得對衝基金經理背後的光環，其實也不外如是？

其實作為一個普通人，投資並沒有那麼複雜，巴菲特也指出只要你用懶人投資法，每月定期買入指數基金(VOO/spy)，即可跑贏市場上99%既投資者

但係我地散戶點樣買，最容易贏錢呢？ 假設你有12000U，情景1:依家一次過買，情景2：分開12個月買，每個月買1000U，根據下圖顯示97-20年期間有76%情景1係跑贏，而08金融海嘯時，情景2大幅跑贏，主要係在金融海嘯前一次買入的指數基金錄得大幅虧損。 當然你話，現在美股升到咁高，係咪應該平均入會好D？ 如果你真係怕08式崩盤，其實也可以用情景2去買，根據統計而言，情景2比情景1也只是低4%績效下一部分就要幫年輕人計算一下，月供VOO可以的回報是否可觀？ 假設你係一個啱畢業的學生，21歲，如果由工作開始每個月定期3000蚊買入voo,假設按返每年8%增長，12年後你可以獲得721526，可以參考下圖。但投資最強的魔術就係時間和複利 如果我地將呢一筆錢繼續放係voo身上30年，唔繼續買，唔繼續操作，呢筆錢在你退休時將會滾到7890414，相信到時大家對退休都覺得有返D保障？（香港是沒有退休保障的）ifec可以搵到以上的計算器。可以因應自己情況去計算

最後我地就探討一下作為散戶既我地，應該持續每個月買入，定係等到低位先買？見到呢個問題，99.9%人（包括我）都會話，股票一定要低買，逢低買肯定賺錢 首先我地設定兩個情景 1.每月投資100U 2.每個月存100U，然後化身成為全能的上帝，等到兩個歷史高位中間的低位先講存既錢一次過買 但以上兩個情景都只買不賣 圖1顯示了96年-20年兩個情景的績效，如無意外身為上帝的情景2勝出了，而情景2在08海嘯後開始領先情景1，因為情景2在不斷存錢，直到低位才一次過出手 但我地不妨把時間再拉長小小，拎1975年後的40年出黎對比 圖2用40年比較，令人驚訝的是全能的上帝居然輸給了情景1 究竟發生了什麼事？ 其實有小小的盲點，75年後美股一直去到85年才創新高，所以情景2的錢一路到85年後才可以買，而情景1的投資早已因為時間好似雪球滾大，圖3係每一筆100元到2015年成長到的金額 所以盡早投資及時投資和正確投資，另外投資是一輩子的事情 另附上1920年後40年兩個情景績效